ચીખલી બીટ-1ના કેળવણી નિરીક્ષક તરીકે રાજેશભાઈ પટેલને વધારાનો ચાર્જ, ચીખલી તાલુકા પ્રાથમિક શિક્ષક સંઘ દ્વારા સન્માન

ચીખલી તાલુકાના અંબાચ પ્રાથમિક શાળાના મુખ્યશિક્ષક (HTAT) શ્રી રાજેશભાઈ પટેલને જિલ્લા પ્રાથમિક શિક્ષણ સમિતિના આદેશ અનુસાર ચીખલી બીટ-1ના કેળવણી નિરીક્ષક તરીકે વધારાનો ચાર્જ સોંપવામાં આવ્યો છે.

જિલ્લા પ્રાથમિક શિક્ષણ સમિતિ, નવસારી દ્વારા બહાર પાડવામાં આવેલા આદેશ મુજબ જિલ્લામાં કેળવણી નિરીક્ષકોની ખાલી જગ્યાઓને ધ્યાનમાં રાખી તાલુકાવાર સૌથી વધુ સિનિયર, કાર્યદક્ષ અને સ્વૈચ્છિક સંમતિ ધરાવતા મુખ્યશિક્ષકો (HTAT)ને કેળવણી નિરીક્ષક તરીકે વધારાનો હવાલો સોંપવાનો નિર્ણય લેવામાં આવ્યો છે. તે અનુસંધાને શ્રી રાજેશભાઈ પટેલને ચીખલી બીટ-1ના કેળવણી નિરીક્ષક તરીકે આગળની સૂચના સુધી વધારાનો ચાર્જ સોંપવામાં આવ્યો છે.

આ નિમણૂકના અવસરે ચીખલી તાલુકા પ્રાથમિક શિક્ષક સંઘ દ્વારા સમરોલી પ્રાથમિક શાળા ખાતે શ્રી રાજેશભાઈ પટેલનું પુષ્પગુચ્છ અર્પણ કરી ઉષ્માભર્યું સન્માન કરવામાં આવ્યું હતું.

આ પ્રસંગે ચીખલી તાલુકા પ્રાથમિક શિક્ષક સંઘના પ્રમુખ શ્રી હિતેશકુમાર પટેલ સહિત સંઘના હોદ્દેદારો અને શિક્ષકમિત્રો ઉપસ્થિત રહ્યા હતા. સૌએ શ્રી રાજેશભાઈ પટેલને નવી જવાબદારી માટે શુભેચ્છાઓ પાઠવી તેમના સફળ કાર્યકાળની કામના વ્યક્ત કરી હતી.

શિક્ષણ ક્ષેત્રે તેમના અનુભવ, કાર્યનિષ્ઠા અને નેતૃત્વના ગુણોને ધ્યાનમાં રાખી તેમને સોંપાયેલી આ નવી જવાબદારીથી ચીખલી તાલુકાના પ્રાથમિક શિક્ષણના ગુણવત્તાયુક્ત વિકાસને નવી દિશા મળશે તેવી આશા વ્યક્ત કરવામાં આવી હતી.